ចោរប្លន់ ប្លន់អ្នករត់ម៉ូតូឌុបបានសម្រេច
10-August-2016 | ដោយ មែន កំសត់
រាជធានីភ្នំពេញ ៖ កាលពីម៉ោង៧និង៤០នាទីយប់ ថ្ងៃទី០៩ ខែសីហា ឆ្នាំ២០១៦នេះ ស្ថិតនៅកន្លែងលក់ទឹកត្នោតជូរ ក្នុងភូមិទួលពង្រ សង្កាត់ចោមចៅ ខណ្ឌពោធិសែនជ័យ។ មានករណីប្លន់យកម៉ូតូមួយគ្រឿងដោយជនសង្ស័យប្រើស្នាប់ដៃវាយទៅលើជនរងគ្រោះបណ្ដាលឲ្យរងរបួសហើយយកម៉ូតូជិះគេចខ្លួនដោយសុវត្ថិភាព។ ប្រភពពីជនរងគ្រោះបានឲ្យដឹងថា រូបគាត់ឈ្មោះ ឃឹម យ៉ុន ភេទប្រុស អាយុ៥២ឆ្នាំ មុខរបរអ្នករត់ម៉ូតូឌុប ស្នាក់នៅភូមិថ្នល់បំបែក សង្កាត់ចោមចៅ ខណ្ឌពោធិសែនជ័យ។
ចំណែកឯស្រុកកំណើតរស់នៅភូមិត្រាចទទឹង ឃុំម៉ឺនជ័យ ស្រុករំដួល ខេត្តស្វាយរៀង។ នៅមុនពេលកើតហេតុជនសង្ស័យបានហៅម៉ូតូឌុបរបស់គាត់ជិះពីចំណុចរោងចក្រដំបូលខៀវ ឆ្ពោះទៅផ្សារឃ្លាំងរំសេវ ហើយបន្តទៅផ្សារអូឬស្សី រួចហើយហួសទៅម៉ុងឌីយ៉ាល់ ចេញពីម៉ុងឌីយ៉ាល់ទៅចំការដូង និងទិសដៅចុងក្រោយឲ្យឌុបបន្ដទៅទួលពង្រដែលជាកន្លែងកើតហេតុ។
ក្រោយនោះបន្ដិច ជនសង្ស័យបានយកស្នាប់ដៃវាយមកលើរូបគាត់ជាច្រើនដៃ បណ្ដលឲ្យបែករយះជាច្រើនកន្លែង ចំណែកជនរងគ្រោះត្រូវបានបញ្ជូនមកកាន់គ្លីនិកឯកជនមួយកន្លែងក្នុងសង្កាត់ចោមចៅ។ គួរបញ្ជាក់ផងដែរថា ម៉ូតូរបស់ជនរងគ្រោះដែលជនសង្ស័យប្លន់យកទៅបាត់នោះម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ស្វាយរៀង 1G-0618។ បច្ចុប្បន្នជនរងគ្រោះពុំទាន់បានដាក់ពាក្យបណ្ដឹងបញ្ហាបាត់ម៉ូតូនេះនៅឡើយទេ ព្រោះកំពុងសម្រាកព្យាបាលមុខរបួសសិន៕
ចំនួនអ្នកទស្សនា
- ថ្ងៃនេះ3671
- ម្សិលមិញ11441
- សប្តាហ៍នេះ33501
- ខែនេះ148651
- ឆ្នាំនេះ148651
- សរុប20591107